طقم أكواب سنوبيك ساكورا

الصراحة من كثر ما هو جميل، ودك تحتفظ فيه وما تستخدمه. لكن دائمًا تذكّر أن المنتجات صُنعت عشان نستخدمها، ما نخزنها. وهذا بالذات معمول عشان تظهر فيه آثار استخدامك له، كأنه يروي قصتك معه. هذا أول منتج موسمي محدود من سنوبيك، وبداية سلسلة جديدة يطلقون فيها منتجات حسب الموسم. في اليابان عندهم مفهوم 72 موسم مصغّر، مو بس أربعة فصول؛ يعتبرون كل تغيّر بسيط في الطبيعة موسمًا مصغّرًا، يعني تقريبًا كل خمسة أيام عندهم موسم جديد. الفكرة إنك تلاحظ التفاصيل الصغيرة في الطبيعة. الأكواب من تيتانيوم بطبقتين، عشان تعزل البرودة والحرارة، لكنها خفيفة جدًا بشكل ما تتخيل، وتتخزن داخل بعضها مثل أكوابهم التقليدية. اللي يميّز هذي النسخة هو لونها، المستوحى من الربيع الياباني وأزهار الساكورا. تشطيبها بعملية أكسدة للتيتانيوم بالموية والكهرباء؛ يغمرون القطع داخل الموية ويكهربونها بطريقة معيّنة يتحكمون فيها بالألوان، لين تطلع لنا هالتحفة الفنية. اللون يتفاعل حسب استخدامك له، والإضاءة والبيئة اللي حوله؛ كل عنصر حول الكوب له تأثير على لونه. إصدار محدود جدًا بـ1200 طقم في العالم فقط. ومع هالمنتج، هم ما يبيعونك مجرد كوب؛ يبيعونك الشعور كامل معه، والاحتفاء بالتغيّرات البسيطة اللي تصير في الطبيعة. باختصار، كوب يخليك تتأمل التفاصيل الصغيرة. وش رأيكم فيه، أعجبكم؟